Ак-Талаа районунда мектеп окуучулары  Россияда өткөрүлгөн VII эл аралык армия оюндарында (АрМИ-2021) ийгилик жараткан Талантбек Илимбеков менен жолугушту.

Жолугушууга райондук аскер комиссариатынын комиссары Урматбек Икрамбаев, мектептин аскерге чейинки даярдык сабагынын мугалими Шаршенбек Мурзабеков жана мектеп администрациясы катышты.

«Десанттык взвод» мелдешинде команданын капитаны  Талантбек Илимбеков аталган мектепте окуганын, баса белгилеп окуучуларды Ата Мекенин коргоого, сүйүүгө, ал үчүн кызмат кылууга жана билим алууга  чакырды. Ошондой эле аталган мелдештеги жеңиш жөнүндө айтып, окуучулардын суроолоруна жооп берди.

«Мелдештин жүрүшүндө кыйынчылыктар болду. Мен танкалык экипаждын ичинде командирлик милдетти аткардым. Үчтөн танкист менен 3 экипаж катыштык. Биринчи жарышта үчүнчү чыктым. Андан кийинки 2-3-жарышта биринчи чыгып жаттым. Биринчи жолу катыштым», — деди.

Ал андан ары сөзүн улап, буларга токтолду.

«Мелдешке катышуу үчүн январь айынан тартып эле Баткенде машыгуу, даярдануудан өткөнбүз. Албетте, жеңишке жеткенибиздеги сезимдерди сөз менен айтуу кыйын. Аябай кубанычта болдук. Танкалык биатлондо буга чейин деле кыргыз армиясы 5-6-орундарды камсыздап келишкен. Бул дагы өтө чоң ийгилик. Бул жеңиш өзгөчө болду. Мындан ары дагы мелдешке жөнөтсө, бара беребиз. Ал эми аскердик кызматымды ардактуу эс алууга кеткичекти уланта берем.  Ата Мекенге кызмат кылам!» — деди Т.Илимбеков.

Андан соң мугалимдери менен окуучулук кездеги окуяларды эскеришти.

 

Барчын Мамытбекова