Бүгүн Ак-Талаа районундагы Ш.Бейшеналиев атындагы инновациялык орто мектебинде Ооган согушунун ардагерлери менен жолугушуу өткөрүлдү. Жолугушуу Ооган согушунун аяктагынын 33 жылдыгына арналып, окуучуларды патриоттуулукка тарбиялоо, эрдикти эскерүү, алардын Ата Мекен алдында аткарган жоокердик милдетине таазим кылуу максатында уюштурулду.

Жолугушууда ардагерлер Ооган согушундагы башынан өткөргөн оор күндөрдү эскеришип, окуучулардын суроолоруна жооп беришти.

Ооган согушунун ардагери Жаныбек Маметов согушта өткөн күндөрдү эскерүү оор экенин айтты:

“Ооган жеринен акыркы советтик жоокердин чыгарылып кеткенине 33 жылдын жүзү болду. Алгач Армияга чакырылганда атайын окуудан(учения) өттүк. Ошол жерден Афганистанга барарымды уктум. Мен ага чейин эле айдоочунун окуусун бүткөм. Барганда артиллериялык дивизиондо реактивдүү батареяда чалгынчы болуп кызмат кылдым. Бир нече жолу согуштук операцияларга катыштык. Андай күндү адамзатка каалабайм. Тынчтык болсун. Мекенге кызмат кылган эр-азамат болгула”.

Жолугушуунун соңунда жашы жеткен уландарга аскердик кызматка жарактуу деген күбөлүктөрү тапшырылды.

Ошондой эле мектептин таланттуу окуучулары даярдаган ыр-бий тартууланды.

 

Гүлжаз Капарбекова, Барчын Мамытбекова