Ак-Талаа районундагы Шүкүрбек Бейшеналиев атындагы инновациялык орто мектебинде кыз-келиндер арасында  волейбол боюнча өтмө кубок жана аркан тартыш улуттук оюну боюнча мелдеш өткөрүлдү. Аны райондук жалпы дарыгерлер  практикалык борбору уюштуруп, Баетов айылындагы мекемелерде иштеген кыз-келиндердин 8 командасы катышты.

Ак-Талаа райондук спорт инструктору  Улан Доктурбек уулунун айтымында өтмө кубок ай сайын уюштурулуп турат.

«Кубоктун негизги максаты-аялдар арасында сергек жашоо образы калыптандыруу, кыз -келиндер арасында спортко кызыгууну күчөтүү жана  кеңири жайылтуу  болуп саналат» дейт.

Жыйынтыгында  волейбол  боюнча 1-орунду Э.Карасартов мектебинин кыздары камсыз кылса,  2-орунду  Терек айылынан келген  команда жеңип алды.

3-орунга Ш. Бейшеналиев мектеби ээ болуп, кийинки оюнду өткөрүү кезеги Аялдар Кеңешине тапшырылды. Ал эми аркан тартыш боюнча 1-орунга «Тынчтык» бала бакча, 2-орун Ш.Бейшеналиев мектеби, 3-орунду Аялдар кеңешинин  командалары жеңип алышты.

Оюндун жүрүшүндө мыкты оюн көрсөткөн оюнчуларга сыйлыктар тапшырылды.

Улан Доктурбек уулу кыз-келиндер арасында волейбол сүйүүчүлөр көбөйүп жатканын, ар бир команда артыкчылыктарды көрсөтө алгандыгын кошумчалады.

Улуттук оюндарды жайылтуу максатында мелдеш өткөрүлдү 

Гүлжаз Капарбекова, Барчын Мамытбекова