Учурда Ак-Талаа районундагы 18 орто билим берүүчү мектепте 7066 окуучу билим алат. Ал эми алардын окуу китептер менен камсыз болуусу 82,6 % түзөт. Тактап айтканда, райондогу жалпы мектеп фондунда 77 461 окуу китеби болсо, 63 431и окуучуларга таратылып берилген.

Ак-Талаа райондук билим берүү бөлүмүнүн адиси Мирбек Чырмыевдин маалыматына караганда жетишпеген окуу китептери боюнча Билим берүү жана илим министрлигине билдирме берилет.

“Жыл сайын жаңы окуу жылында мектептердин окуу китептери менен камсыз болуусу боюнча маалыматтарды алабыз. Мындан сырткары окуучулар kitep.org.kg сайтынан окуучулар жетишпеген китептердин электрондук вариантын окуй алышат. Чындыгында окуу китептеринин жетишсиздиги окуучунун терең билим алышына кедергисин тийгизет”,- дейт.

Билим берүү жана илим министрлиги быйыл окуу китептеринин сапатын жакшыртуу максатында «Окуу китеби» республикалык илимий-практикалык борборун түздү. Борбор окуу китептеринин мазмунун жакшыртуу максатын көздөйт.

Барчын Мамытбекова